مبصوت ليه

احلى حاجة انك تبقي مبصوت ومش عارف مبصوت ليه

يمكن عشان راضي ويمكن عشان مفيش مشاكل بس مش مهم المهم انى بحاول اكون مبصوتة حتى لو عينى الدموع نازلة منها

ويعجبنى توهانى في احلامى بتوه في احلامى وانسي الحزن

................................................................

عفوا انها ليست يوميتى

بالفعل انها ليست يومية سخيفة من يومياتى

ولكنها لأختى التى كانت تبلغ في يوم من الايام مايقرب من الـ 6سنوات

لقد كانت تردد على مسمع ابي على حد تعبيرها الطفولى

بابا احلق شعرك زي خالو

فكان يرد عليها وهو يناديه باسم البطة دونالد : بس انا مش عارف الحلاق اللى بيحلق عنده

البطة دونالد : خلاص يا بابا المرة الجاية هسأل خالو على اسم الحلاق عشان يحلقلك زيه

وكنا نضحك كثيرا عليها

فكانت البطة دونالد تتمنى كثيرا ان يصبح ابي قليل الشعر مثل خالو

لقد كانت البطة دونالد كما اسميناها ومازلنا نردد علي مسمعها ذلك الاسم كانت عاشقة لاوامر خالو بما فيها من اوامر عسكرية انا لا احبذها في بعض الاحيان انه ظابط متقاعد وكما يقولون ( على المعاش ) حضر حرب 73

عند إصابة بطتنا الدونالد بنوبة برد والتى كانت كثيرا ما تلازمها في صغرها فلا يستطيع احد اقناعها بأن عصير الليمون مفيد غير خالو - غير ذلك انها كانت تسعد كثيرا بزياراتنا المتبادلة مع خالو بحكم القرب النسبي بين المنزلين هذه المرة ليست من اجل عيون خالو فحسب فعيون البنت التى قدمت بعدها بسنة او اثنان تحتاج الى زيارات دورية من دونالد الى منزل خالو

مازالت البطة دونالد تحب ابنة خالها التى تصغرها بسنة او اثنتين رغم مشاركة الاخيرة لها في اسمها فالعائلة تناديها ببطة وفقا لاسمها الذي جرت العادة ان نطلق عليه بطة

انها تلك البطة التى انتظرتها طويلا كهدية لي من ابي وامى لتعوضنى عن وحدتى

انها تلك البطة التى كنت احملها بين يدي والان لم اعد قادرة على حملها مرة اخرى ليس لعجز منى ولكن لان الانسان لايستطيع حمل من هو اكثر طولا منه

احببتك ايها البطة دونالد في صغرك عندما كنتى تمشين على اطراف اصابعك مثل لاعبي الباليه كما كان يردد اقاربنا

واحببتك ايضا عندما جمع ابي بعد مرور اسبوع من ميلادك شيئان معا فلقد اشترى لحما ننتفع به في العقيقة و عمل سبوع عبارة عن لفائف من الحلوى والشيكولاتة التى اعشقها مصحوبة بكارت مكتوب عليه الاسم ويوم الميلاد وذلك من اجل عيونى

اتذكر ذلك الخروف السمين الذي كنا نضعه في صالة منزلنا ومعه العنزة التى كانت لاتأكل الا من يد عمتى وحتى الان لا نعرف السبب لماذا تفضلها علينا فلقد كانت تنادى وتقول :

ماااااااااااااااااااااااااااااااااااااااااااااااء

ماااااااااااااااااااااااااااااااااااااااااااء

وفي نبرة صوتها معانى تقول بأنى لا اريد البرسيم سوي من يد عمتكم

غريب امر تلك العنزة لقد احبت عمتو كما احببناها

على الان ان اكلم بطتى الدونالد لاسألها عن مفاتيحي التى اضعتها

وفي نهاية كلامى اعتذر عن اخطائي النحوية ان وجدت

رامى + رضوى = كتبت على الحيطة ليه

كعادتى كل يوم احب انى امارس رياضة المشي وانا مروحة

وبيبدأ مشوارى بأنى امر داخل نفق

وياويلتاااااااااااااااااااااه من ذلك النفق

اشخاص لا يستحق لهم ان يقال عليهم محترمين

وده لانهم على طول طريق النفق كاتبين الفاظ متقدرش غير انك مترفعش عينك على الحيطان بتاعت النفق

اقل ما يقل عنها انها بزيئة بالذال

ده غير بحبك يا رضوى

حبيبي يارامى

امينة + ايمن = اجمل حب

وبعدين في اخر النفق تلاقي نمرة وبين قوسين مكتوب عليها ( رضوي الـ ........)

وجملة النظافة من الايمان اللى مكتوبة بشكل لا يمد للنظافة او الدين بأى صلة

بس الحمدلله خلال يومين اما مشيت تانى في النفق ده لاقيت انهم دهنوه تانى

ورحموا عنين الناس من الـ ........................

وشكرا

اعترف بأنى حقودة ومفترية ونظري ضعيف

اعترف انا المواطنة فكرة بأننى حقودة ومفترية ونظري ضعيف

وملابسات الاعتراف نفسرها كالاتى :

مفترية : لانى كنت بقول على البلد حالتها وحشة مع ان مفيش ناس جعانة ولا حاجة والبلد والحمدلله كله تمام على الاخر

حقودة : لانى كنت مفكرة ان الحكومة بتاخد مرتبات على الفاضي وخلاص ومبتعملش انجازات حقيقية للشعب

نظرى ضعيف : لانى مكنتش بشوف الانجازات دى لكن والحمدلله سمعت برنامج البيت بيتك مع د/ احمد نظيف وعرفت ان انا اللى نظرى ضعيف والحمدلله وان الحكومة شايفة شغلها وتمام التمام والمصالح الحكومية قايمة بواجيها وخاصة ( بين قوسين مصلحة الضرائب )

وهذه كانت ملابسات الاعتراف

والحمدلله

هفتحها يعنى هفتحها

الغريب ان ساعات بيتملكنى احساس بأنى عايزة افتح التلاجة اللى موجودة في الشركة

على اساس انها هيبقي فيها الرز ابو لبن بتاع مااما اللذيذ

او اخد كوباية عصير فراولة هو عادة بتبقي من 3 : اربع كوبايات

والاغرب بقي انى ببقي عارفة مسبقا ان التلاجة مفيهاش غير الميه الساقعة

والبيبسي والليمون

متى ستحين لي الفرصة واخرج معك وحدنا !!!!!!!!!!!

بفرح اوى لما بخرج انا وهو لوحدينا

بستنى الفرصة عشان نخرج انا و هو بس من غير شريك ليا فيه

احساس حلو انك تخرج مع الانسان اللى انت بتحبه

لما بكون زعلانة منه بفتكر قبلته اللى بيطبعها على جبينى الصبح

ولما يرجع من شغله يسلم عليا وانا بطبع قبلة على ايده عشان اشكره اشكره على كل حاجة عملها ليا

من صغرى وهو كان بيكلمنى على القضية الفلسطينية

عمتو تستغرب ازاى عيلة مفعوصة زيي ابوها يكلمها عن القضية الفلسطينية

كانت بتفسر اتساع حدقة عينى بأنى ولا فاهمة حاجة

بس حبيبي كان بيفسرها على انى مستغربة من موقف العرب

كان بيكلمنى عن عبدالناصر

حبيته عشان حبه ليه

كان بيحب عبدالناصر اوى رغم معرفته بالظلم اللى وقعه على محمد نجيب

الا انه كان بيقول انه عشان ينشئ نهضة مصرية تخاف منها امريكا واوروبا كان لازم يبعد اى تهديدات للنجاح

زى ما " محمد على " عمل بالظبط عمل مذبحة المماليك ونفي عمر مكرم عشان يقدر يعمل مصر الحديثة من غير اى تهديدات تأثر على النهضة دى

كنا بنتكلم في الكورة

ومكنتش بحب حصة الكورة دى ولا حتى احب انى اتفرج معاه على الماتشات باستثناء الماتشات المهمة

.............................

.

لما بيرجع بليل ويسألنى عملتى ايه في البحث بتاعك

كله تمام يا فندم

تمام يعنى مفيش اى تقصير

لاء ساعتك كله على اهبة الاستعداد

ورينى كدة البحث بتاعك ، يااااااااااااااااااااااااااااااااااه غلطة املائية فظيعة

حصل خير هصلحها دلوقتى

...................................

.

عندى قدرة غريبة انى اقلده في كل تصرفاته في طريقة اكله في طريقة شربه للشاي واحنا اعدين بناكل كنت اقلد طريقته بس ده عشان بحبه اوى

كان يفضل يضحك على قدرتى على تقليدي ليه بالمللى

................................

لما يزعقلي مكشرش بالعكس اضحك واقوله ماشي هعمل زى مانت عاوز انت بس تأمر

................................

شايفة انه ربانى على ان يبقي ليا رأى

مش كان بيكلمنى في السياسة من وانا في الابتدائية

................................

امتى بقي كل اللى في البيت يخرجوا عشان انا وهو نخرج مع بعض

.................................

بحبك بحبك اوى يا بابا

وحشنى اوى

نفسي اشوفه اوى

وحشنى جدا

بقالى حوالى اسبوعين مش بيكلمنى ولا حتى بيطمن عليا

وانا مروحة ببقي نفسي يطلع من بلكونته ويبصلي

ايوة يبصلي

يبصلي النظرة اللى انا دايما بحبها منه

او يندهلى من بلكونته

يااااااااااااااااااااااااااااااااااه

كان نفسي اوى في مرة اقف واكلمه ومش اتكسف

واقوله انى بحبه اوى

اقوله وحشتنى

او حتى اقوله انت عامل ايه

يااااااااااااااااااااااااااااااه وحشتنى اوى ونفسى ترجع تبص عليا من بلكونتك

نفسي وانا مروحة الاقيك واقف مستنينى تانى

وبتنده عليا

يااااااااااااااااااااااااااااااااااااااااااااااااااه

ليه يغيب عنى في الوقت ده بالذات الوقت اللى كررت فيه انى مش هتكسف تانى

وانى هقف وهسأله عن اسمه

فاكراه لما كنت بعدى من تحت بلكونته ويفضل باصص عليا من اول الشارع لحد ما اوصل تحت البلكونة بتاعته ويسألنى انسة انسة انتى اسمك ايه

الاول كنت بتحرج جدا

وحاسة ان كل الناس بتشاور عليا

بس اخدت قرار انى لازم اسال عليه واشوفه ماله

قالولى ان مصطفي ايوة طلع اسمه مصطفي

ياااااااااااااااااااااااااااااااااااااااااه اسمه جميل اوى

قالولى ان مصطفي راح المسابقة

مسابقة ؟ مسابقة ايه ؟

اصل مصطفي هيشترك في مهرجان ذوى الاعاقة الذهنية في اسيوط ؟

يااااااااااااااااه عشان كدة بس يا مصطفي بعدت عنى

ومش بقيت تقف تستنانى

اول مرة سمعت ان في مهرجان في اسيوط كان نفسي تبقي انت فيه

لإن شخص زيه موهوب اوى ولازم يكون المهرجان محتاجه

ان اول مانت ترجع على طول هجيبلك شيكولاتة من اللى انا بحبها وهعود انا وانت

وناكلها مع بعض

يارب ترجع بالسلامة يا مصطفي

انا معرفتش ارد عليه

انتوا جيل بايز

انتوا ملكوش اى لزمة في المجتمع

زمان مكناش زيكم كدة

انتوا جيل بايز

جيل هيفا وروبي

جيل بحبك يا حمار

كل دى حاجات بنسمعها من اصحاب الزمن الجميل زمن عبدالوهاب وحليم

زمن سومه وفريد

مش صح

يفضلوا يعيبوا على الاغانى بتاعتنا

وميفتكروش منها غير الاغانى الهيفا بتاعت - رجب حوش صاحبك عنى

وبحبك يا حمار

وبكره السجاير

وناسيين حاجات كتير اوى كويسة

زى شيرين بغض النظر عن اغنية انا مش بتاعت الكلام ده

او محمد فؤاد او مدحت صالح او او او الى اخره

هما مش عايزين يبصو لينا غير بنظرة اننا جيل بحبك يا حمار

براحتهم يبصوا لينا زي ما هما عايزين المهم اللى احنا بنعمله

واحنا برضو احرار في اننا نشوفهم زى ما احنا عايزين

بس الفرق بينا اننا هنحترم الفترة بتاعتهم والوقت بتاعهم

ومش هنعيب ولا هنقول على اغنية

شيل الستارة اللى في ريحنا لاحسن جيرانا تجرحنا

ولا اغنية حبة فوق وحبة تحت - ولا حتى الصح الدح امبو دي

كل واحد عايز يشوف نفسه زى ماهو عايز

لو هما جيل : الصح الدح امبو

يبقي احنا جيل - الـ اه ونص

وبراحتنا

هيقولوا

على ايامنا كانت الحاجات دى مش بتبيع كميات كبيرة عشان كان الذوق العام للمجتمع كان راقي

وبرضو احنا عددنا زاد ونسبة اى توزيع لمطرب من المطربين كمان زادت عن الاول

يعنى من الاخر شافونا زى مانتوا عايزين ومتنسوش برضو

ان احنا بس مش جيل بايز

لاء وكمان جيل كمبيوتر وانترنت بنتعلم اى حاجة بسرعة وبسهولة وده لاننا عايزين نعمل كدة

زى ما نتوا برضو كنتوا عايزين تعبروا سيناء في ७३ على اعتبار برضو انكم بتغيزونا

وفي النهاية مش كل اللى سبقونا بيشوفنا كدة

لكن ده كان رد على واحد نرفزنى من الى شايفين نفسهم احسن مننا في كل حاجة وطبعا مدنيش فرصة ارد

عشان كدة جيت ارد عليه في نص شيكولاتة وكيلو فراولة

وبدعى ربنا انى مشوفوش تانى

امييييييييييييييييييييييييييييييين

يومياتى في الابتدائية والعيال المفترية

وافتكرت وياريتنى ما فتكرت

ايوة افتكرت انى بقالى كتير عايشة على الارض نعم عايشة على الارض ( اكيد مش هعيش في البحر يعنى ما انا مش سمكة برضو )

ياااااااااااااااااااااااااااااااااااااااااااااه

ده انا بقيت من المعمرين في الارض

كل السنين دى عايشاها

ياااااااااااااااااااااااه

جه في بالى ايام ما كنت في كى جى وماما وبابا بيبصولى على انى صغيرة اوى ويقولوا في سرهم امتى تكبر بقي


وادينى كبرت اهو واتنيلت

ولعلم سيادتكم الخاص انا بس كبرت عشان احقق امنيتهم مش عشان عوامل الزمن ولا حاجة



وجه في بالى ايام الابتدائي والعيال اللى كانوا في الباص بيضيقونى وكنت اروح معيطة لماما وتقولى مالك اقولها مفيششششششششششششش

كذابة انا اوى مش عارفة ليه مكنتش قادرة اقولها العيال بيضايقونى عشان تكلم المشرفة

يلا الحمدلله ايام وعديت خاصة ان الباص كان كله تكتلات قصدى تحالفات يوووووووه

قصدى اخوات في بعضهم كل اخ يعمل تكتل عسكرى مع اخوه ويتفقوا على العيال الفردانى اللى زيي

فاكراهم فاكراهم بتوع المنصورة دول يوووووووووووووه قصدى فاكراهم باسماهيم

البت سهر محمد على والواد على اخوها وجت في اخر سنة في الابتدائية اختهم إيثار
البت دي على فكرة ضحكت عليا اخر يوم في الامتحانات وصدمت منى 15قرش يلا ربنا يسامحها المبلغ مش محتاج ادعى عليها

والواد محمدى وهاله اخته التوأم واخوه مصطفي الكبير اللى كان محمدى وهاله بيمشوا كلامهم عليه

كان بيصعب عليا مصطفي اوى اخواته كانوا ممشينه على عجين وهو بصراحة مكنش بيلغبطه

والبت بسمة ونسمة واللى كانت الصغيرة بتمشي برضو كلامها على الكبيرة

حسبي الله ونعم الوكيل فيهم

كانوا بيعملوا خطط استراتيجية على العيال الفردانى اللى زيي

قلبي مش هيسامحهم ابدا

ولا البت دينا المفعوصة اللى كانت بتبهدلنى انا وصحبتى نهى وبتضربنا بت قوية ومفترية زى امها - امها كانت توصلها الصبح وتفتح بؤءها بابتسامة خدوا بالكم من دينا يا ولاد دى اختكم الصغيرة بصرا حة عندى عقدة منها

البت صغيرة كدة بس كانت بتدى بالشلاليط والاقلام اجدع من بروسلي وفاندام بس برضو كنت بعمل عليها خطط استراتيجية مع نهى صبحتى بس برضو كانت بتضربنا اصل انا كنت طيبة اوى وانا صغيرة - على فكرة كلمة طيبة دى تعديل لكلمة هبلة اللى مسحتها

وفقا لرأى شخص كان بيقولى متعمليش فلتر للكلام اللى بتكتبيه سبيه يطلع كدة

يلا ما علينا من موضوع الفلتر ده عشان الحكومة حبيت تعمل مصيف لاهل العبور عشان لقيتهم في الصحرا فغرقت شوراع العبور وبيوتها

خلينا في البت دينا البت العفريتة دى

كنت بتفق انا ونهى عليها او بمعنى اصح بما ان نهى مش شيفانى دلوقتى وحتى لو شفتنى دلوقتى مش هتعرفنى كنت بتفق على نهى ودينا كنت بخلى البت المفترية دينا تضرب نهى وانا مضربش

اصل ده كان بيحصل تضامنا منى مع نهى

وكمان عشان مامتى قالتلى انى اسمع كلام اللى اكبر منى واسمع كلام ام دينا المفترية اللى كانت بتقولى خدي بالك من دينا

عشان كدة كنت ببيع نهى

عندى بس ملحوظة صغيرة انا كنت بحب اضايق دينا اوى

وكنت بتفنن في كدة البراية بتاعتها ارميهالها من الباص

اعود اغيزها وارخم عليها

اعمل فيها مقالب

الى اخره

وكمان في الفصل

كنا صفين صف ولاد وصف بنات

في حصة الاملاء اللى كان بيجيب درجة وحشة كان بيروح يعود في الصف بتاع الولاد

واحيانا الميس كانت بتعمل صف للبلدة في النص لما بتلاقي ان البلدة عددهم كبير اوى

كان نفسي اعود في الصف اللى في النص

بس يا خسارة مطلعتش بليدة

كانوا اصحابي البنانيت الحلوين

مريم - الشطورة اشطر بنت في الفصل

اية - اللى كانت مرة اعدت في صف الولاد عشان بليدة على فكرة دلوقتى هى مش بليدة ولا حاجة بالعكس دي شاطرة جدا

رغدة - سارة - ماريا - مارينا

فضلت معاهم من كىجى وان - لسنة رابعة

يااااااااااااااااااااااااااااااااااه ايام حلوة اوى

كان في واحد مفترى برضو

كان اسمه احمد طه

باباه كان شغال في الشرطة اسم الله عليه

ربنا حرصه وصاينه باباه ده

كان بيجي ياخده كل يوم بالبوكس

ههههههههههههههههه

لزوم الروشنة

كنت بفضل اغيزة في الفصحة انا واصحابي البنانيت

ونقوله واحنا بنطلع لسانا :

يا بلييييييييييييييييييييييييييييييييييد

البليييييييييييييييييييد اهو اهو البليد اهو اهو

يااااااااااااااااااااااااااااااااااه

معقول بعد السنين دي كلها افضل فاكرة اللى كان بيحصل صحيح كانت ايام حلوة

ياسلام لما الميس بتاعتنا كانت تعمل مسابقة في الفصل بين الولاد والبنات

وازاى كنا بنتفق انا وصحباتى على الفريق بتاع الولاد عشان نكسبهم ونفضل نغيز فيهم في الفصحة ونقولهم يا بلدة مش عارفين تكسبونا

وجت سنة رابعة وكمان خمسة وانا في فصل تانى غير الفصل اللى انا كنت فيه بكل حكاياته

بس برضو كانت سنة رابعة وخمسة مليانة بحكاياتها

مع اصحابي - ولاء ((بين قوسين قوقه ))

هدى - كانت عسولة اوى

نهى - دي غير نهى الاولانية - مكنتش بشوفها غير وفي ايديها سندوتش كانت بتاكل 2سندوتش في بؤء واحد

شيماء - اللى سبتنا وراحت فصل تانى كانوا عملينه للبلدة

و دعاء - اللى كانت رخمة محدش بيحبها غيري انا

و هيام - مكنتش من مصر كانت من فلسطين -
كانت بقي عمو البلطجى بتاعنا اى خناقة مع الفصول اللى جنبنا تسد على طول

كفاية كلام عنها عشان قابلتها واحنا كبار وممكن لو قريت ميحصليش كويس

يااااااااااااااااااااااه كانت ايام حلوة اوى

مكنتش بفوت رحلة في المدرسة غير وبطلعها

رحلة لمسرح العرايس ادوس

رحلة للملاهى اطلع

رحلة للقلعة وماله

رحلة للفسطاط وليه لاء

رحلة للفيوم يعنى هى جت على دى

بجد ايااااااااااااااااااااااااااام جميلة اوى

اكدب لو قلت مش عايزة ارجعلها -

بس انا مقتنعة ان لسة في ايام اجمل واجمل من اللى فاتت

يمكن متكونش جميلة زى اللى قبلها

بس اللى متأكدة منه انى مش هسيبها تعدى غير لما اعيشها

القطة ميووووووو والكلب هوهوهوهو

كان يا مكان

كان في غابة من الغابات

بيعيش القط ميوووووو

وكمان الكلب هوهوهوهو

وكمان كان فيه شوية حيوانات

منهم اصحاب هوهوهوهو

ومنهم الى اصحاب ميووووووو

وفي يوم من الايام صحي اهل الغابة على صوت ميووووووووو وهى بتصرخ و تقول نونو نو نو نو نو الحقونى هوهو هوهو خد بيتى

جم اصحاب هوهو وقاله لميوووووو معلشي يعنى هو هينام فين

واصحاب ميوووووووو اعدوا يتفرجوا

وفضلوا كدة ايام وشهور وسنين

واصحاب ميووووووو يعلقوا لافتات ويعملوا بيانات على ورق الشجرة وعلى رمل الغابة

وميووووووووو بتصرخ وتعيط وتقول نونونو انا عايزة بيتى

ولما زهقت ميووووو من اصحابها راحت مخلية ولد من ولادها يخربش هوهوهوهو

هوهو هو هو راح لاصحابه وقالهم شايفين ميووووووو بيعمل ايه عشان لما اقولكم ميووووو ارهابي تبقوا تصدقونى ده بيتعمد يسن مخالبه عشان يعورنى

ده مش بيعرف في الاصول ميوووووو ده همجى

انتوا لازم تسيبونى عليه وانا اشوف شغلى معاه

وراح هوهو ورمى على ميوووووووو وولاده قذائف بذر الخوخ رماهم عليه من خلال برشوتات قشر الموز وقشر البرتقان

وميوووووووووووو يصرخ ويقول الحقونى ولادى بيموتوا

يروح لاصحابه يقولوا انت الى خلقت الذريعة لـ هوهو عشان يضربك

يقولهم الحقونى هوهو بيضرب اولادى ومانع عننا اللبن والسمك

يقوم اصحاب ميووووووو يختلفوا مع بعضهم

جزء: يقول ميوووووووو خلق الذريعة لهوهو

وجزء يرد ويقول : انت اللى تغافلت عن حق ميووووووووو وعملت اتفاقية مع هوهو

والجزء الاول انشغل بالجزء التانى : ونسيوا ان هوهو بيضرب في ولاد ميوووووووو

هوهو نازل يضرب في ميووووووووو واولاده مش بس ببذر الخوخ لا ده ابتدى يحدفهم بحب الرمان

وبس على كدة

طبعا فاهمين مين هوهوهوهو

ومين ميوووووووووو

ومين اصحابهم الحيوانات

وايه هو بذر الخوخ وحب الرمان

وبس على كدة

الشبكة 3

ناس تتداين علشان يقولوا احنا جيبنا شبكة بشئ وشويات

عشان ابنى ميطلعش في نظر نسايبه اى كلام

...............................................

وناس تاأجر شبكة او تستلفها من بنت خالتها عشان ميبنش عريس بنتهم

مش اد المقام

....................................................

وناس تتفق مع بعضها هنجيب الشبكة ونلبسها للعروسة بس هنبيعها بعد الخطوية بشوية علشان اقدر اجهز الشقة

بس هنجيبها عشان الناس

...................................................

وبنت عريسها مجبلهاش شبكة يادوب جاب الدبلة والمحبس

تقوم تلبس دهبها ودهب الجيران وتحطه في علبة ال يعنى عريسها الى جيبهولها

...........................

طب ليه ده كله ليه نكذب ونغش الناس

وهما اصلا مال الناس ومالنا الناس ولا هينفعونا بحاجة ولا حتى محتاجة

ليه نداين ونستلف

ليه نكدب

بس كدة

الشبكة 2

اتفقوا على الشبكة

وحددوا ميعاد شراها

وطبعا كانت عنين ام لطيف على لطيف لا تختار حاجة يكون وزنها اكتر من الوزن المطلوب

والحمدلله عدى يوم شرا الشبكة من غير خناق

عشان ام لطيف كانت محبكاها شوية في اختيار لطيفة للاسورة وكمان الخاتم

حلو الخاتم ده يا لطيف

ام لطيف تتدخل وتقول لالالالالالا دى مش اد كده خالص خدي دى احسن مفيهوش فصوص

ده حتى عشان لما تيجي تبيعيه متخسريش فيه

لطيفة : ابيعه

وابو لطيف غطي على الكلمة اللى وقعت من بؤء ام لطيف

وحصل خير واليوم عدى على سلام

ام لطيف خدت الشبكة عندها قبل ميعاد الخطوبة بيومين

عشان بالشبكة تتباهى وسط جيرانها وقرايبها

وتقول لطيف جاب شبكة محدش جابها ادها في الشارع

ده حتى احسن من شبكة ابن نحمدو اللى كانت مفكرة ان ابنها يا ما هنا ويا ما هناك

وكمان لطيفة اتباهت وسط اصحابها بالشبكة اللى جابها لطيف

ومنسيتش تتباهى بتمنها

بصراحة المبلغ يستاهل الواحد انه يتباهى بيه

بس لطيفة نسيت ان الشبكة اللى جابهلها لطيف مش جايبها عشان ولا حتى جايبها عشان هو نفسه يهاديها بأحلى حاجة عنده

لاء

ده جابها عشان سلو عيلتهم بيقول كدة

وعشان هى دى الاصول والعرف كمان

يعنى المبلغ مش مهم اهم حاجة يكون عايز يهادى لطيفة بحاجة وتفضل ذكرى عندهم طول العمر

لكن لطيف ادي للطيفة شبكة جايبها عشان الناس والاهل

مش عشانها باعتبارها شريكة حياته

وبس كدة

نكمل المرة الجاية

الشبكة 1

مش عارفة ابدأ منين

بس عادة اصلا انا عمرى ما بدأت الموضوع من اوله

ندخل بقي في الموضوع

بس قبل ما ندخل

لازم نتفق

نتفق

هنتفق على ايه

ان الافكار مش مرتبة

واللى هيجي في بالى هقوله وبس

وده طبعا بدل ما اكلم نفسي

نبدأ بقي

000000000000000

00000000

00

0

الشبكة

اااااااااااااااااااااااااااااااخ

اخ من الشبكة واللى بتهببه

نزاعات في المحاكم على الشبكة

عريس جاب لعروسته الشبكة وحب يسيبها هى مترضاش تديهوله وتقول ان ه حقي هو مفكر دخول بيوت الناس لعبة ولا ايه وهو اللى سبنى يبقي المفروض انه يتنازل عن حقه والى ................. اخره بقي

طب احنا جبنا الموضوع بداية من اخره

حتى ياريت اخره كان بيتمتع بلمسة رومانسية

زى الشيخ مأذون كتب الكتاب وعلى الجواب

او لطيف ولطيفة عاشوا في سكات وخلفو صبيان وبنات

طيب نتكلم لما لطيف اتقدم للطيفة

الاول سأل عليها لاقها بنت حلال والادب والكمال في عيلتهم التزام اتقدملها وراح لوالدها والرد استناه منه عشان يقوله على الرد من ست الحسن وزينة الاخلاق

وجه الرد من لطيفة بعد ما قال والدها عن اخلاقه وصفاته وعيلته ووظيفته ومنساش امكانياته

لطيفة وافقت وقالت عليه ماشي كفاية انه اخلاق وكمان من عيلة كريمة

و في وقت الاتفاق

اعد ابوها وابوه واخوها واخوه وعمها وخاله في الاتفاقات اتكلموا

هتجيبوا الانتريه

لاااااااااااااااااااااااااااا ده كتير اوى

حاجات عليكم

و

حاجة علينا

انتوا عليكم الانتريه

طب والستاير يا حج دى المفروض على العروسة

ايوة بس احنا هنجيب السجاجيد والقطن

يبقوا تجيبوا انتو ا بقي الستاير

ومتنسوش اننا بنشتري راجل

ام لطيف اعدة مع لطيفة وامها في اوضة قريبة من الاوضة اللى فيها اتفاق الرجالة عشان يسمعوا كل التفاصيل

ما هو برضو مينفعش يعودوا في اعدة الرجالة

ام لطيف وهى بتسمع في الاوضة جوانية سمعت لطيف وهو بيقول ان اوضة الاطفال عليا

مصمصت شفايفها وقالت اديهم بدأوا في الاستغلال ده الواد كدة هيجيب كل حاجة

ولطيف صمم ان كل حاجة يبقوا متفقين عليها الخطوبة والفرح وكتب الكتاب كمان وقته وميعاده .

عشان من الاول نبقي على نور

والاتفاق يبقي على ميه بيضة

وفى وسط الاتفاق

جت سيرة الشبكة

اول مالسيرة جت ابو لطيفة قال

احنا بنشتري راجل

والشبكة دى هدية منك لعروستك

بس

الاصول بقت تقول انها عرف يعنى لازم نتكلم فيها

ومفيش وحدة في عيلتنا جالها شبكة بأقل من ............ مكان النقط مبلغ وقدره طبعا

وهو كله هيرجعلك في بيتك

احمر وش لطيف وكمان مامته وباباه استكبروا المبلغ وقالوا عليه ده رقم فلكي

ام لطيفة تمصمص شفايفها وتقول هما مش عارفين هما هيناسبوا مين

دى لطيفة دى يستمناها اى شاب في الدنيا وهى مش اقل من قرايبها اللى جالهم شبكة بأكتر من المبلغ اللى بيقول عليه ابو لطيفة

وفي الاخر اتفقوا

على مبلغ مقارب للمبلغ اللى قاله ابو لطيفة

ده كمان

علشان سلو عيلة لطيف انهم يجيبوا شبكة 000000 مبلغ مكان النقط

وهما مش هيجيبوا شبكة للطيفة اكتر من اخته انعام لما جت تتجوز

واتفقوا

وشاور ابو لطيفة لـ ام لطيفة بأشارة توحي لها بأنهم خلصوا اتفاق

ويلا زغررررتى يا ام

وانبسطي يا لطيفة

عريس لقطة قيمة وسيما ووظيفة ميرى

وادفع يا لطيف تحويشة العمر في الشبكة زى ما جوز اختك انعام عملها قبلك ودفع

ما هو نسي انه لما يفكر يبقي عريس لازم يبقي مليونير

ونكمل المرة الجاية

وبس !!!!!!!!!!!!!